(એજન્સી) મુંગેર, તા.૧૯
બિહારની હબીબા બુખારીએ બિહાર ન્યાયિક સેવા પરીક્ષા (PCS-J)માં નોંધપાત્ર સફળતા મેળવી છે, ૩૦મો ક્રમ મેળવીને ન્યાયાધીશ બની છે. રસપ્રદ વાત એ છે કે હબીબાના પિતા મસ્જિદના ઇમામ તરીકે સેવા આપે છે. હબીબાની આ સિદ્ધિ માત્ર તેના પરિવાર માટે જ નહીં પરંતુ સમગ્ર સમુદાય માટે ગર્વનો વિષય બની છે. હબીબા બુખારીએ અરવાટિકા ફેઝ-વન સ્થિત ’પાઠશાળા ક્લાસીસ’માંથી કોચિંગ મેળવ્યું હતું અને ન્યાયિક સેવા પરીક્ષા સફળતાપૂર્વક પાસ કરીને એક નવો દાખલો બેસાડ્યો છે. તેની સફળતાથી તેના પરિવારમાં ખુશીની લહેર ફેલાઈ ગઈ છે, પરંતુ પાઠશાળા ક્લાસીસ અને તેના મિત્રોમાં પણ ખૂબ આનંદ થયો છે. પાઠશાળા ક્લાસીસના ડિરેક્ટર અમર વાર્શ્નેયે હબીબાની સફળતા પર ગર્વ વ્યક્ત કરતા જણાવ્યું હતું કે, “હબીબાની સફળતા તેમની સખત મહેનતનું પરિણામ છે. આ અમારી સંસ્થા માટે પણ ગર્વની ક્ષણ છે. આ સિદ્ધિ મહિલાઓની વધતી ભાગીદારી અને ન્યાયિક પ્રણાલીમાં નવા ચહેરાઓના આગમનનો સંકેત આપે છે. તેમની સફળતા ન્યાયિક સેવાઓમાં જોડાવાનું સ્વપ્ન જોતા અન્ય વિદ્યાર્થીઓ માટે પણ પ્રેરણારૂપ બનશે.” પાઠશાળા ક્લાસીસએ ફરી એકવાર તેની તાલીમ ગુણવત્તાની શ્રેષ્ઠતા દર્શાવી છે, જે વિદ્યાર્થીઓને સફળતાની નવી ઊંચાઈઓ પર સતત માર્ગદર્શન આપે છે. હબીબા બુખારીને તેમની પસંદગી બદલ અભિનંદન પાઠવવા માટે પુષ્પગુચ્છ અર્પણ કરતી વખતે, અમર વાર્શ્નેયે ટિપ્પણી કરી હતી કે, “હબીબાની સફળતા આપણને એક શક્તિશાળી સંદેશ આપે છેઃ કોઈપણ ક્ષેત્રમાં સફળતા પ્રાપ્ત કરવા માટે સખત મહેનત અને નિશ્ચય આવશ્યક પૂર્વશરતો છે.”